ai mauj-e-saba soz-e-mujassam use kahna

ai mauj-e-sabā soz-e-mujassam use kahnā

mumkin hai vo pūchhe mirā aalam use kahnā

chāhā mire hālāt ne paiham use kahnā

lekin na huī pyaar kī lau kam use kahnā

ik ham hī nahīñ shākī-e-ālam use kahnā

ab ahl-e-tarab ko bhī hai ye ġham use kahnā

shāyad kabhī paḌ jaa.e kisī taur zarūrat

milte haiñ sar-e-rāhguzar ham use kahnā

tū kis liye nārāz huā ahl-e-vafā se

duniyā to hamesha se hai barham use kahnā

kahnā to bahut kuchh hai magar maslahat-e-vaqt

be-āb se haiñ sho.ala-o-shabnam use kahnā

maanā ki mire dam se nahīñ bazm kī raunaq

phir bhī to ġhanīmat hai mirā dam use kahnā

ai mauj-e-saba soz-e-mujassam use kahna

mumkin hai wo puchhe mera aalam use kahna

chaha mere haalat ne paiham use kahna

lekin na hui pyar ki lau kam use kahna

ek hum hi nahin shaki-e-alam use kahna

ab ahl-e-tarab ko bhi hai ye gham use kahna

shayad kabhi paD jae kisi taur zarurat

milte hain sar-e-rahguzar hum use kahna

tu kis liye naraaz hua ahl-e-wafa se

duniya to hamesha se hai barham use kahna

kahna to bahut kuchh hai magar maslahat-e-waqt

be-ab se hain shoala-o-shabnam use kahna

mana ki mere dam se nahin bazm ki raunaq

phir bhi to ghanimat hai mera dam use kahna