ai mausam-e-junun ye ajab tarz-e-qatl hai

ai mausam-e-junūñ ye ajab tarz-e-qatl hai

insāniyat ke khetoñ meñ lāshoñ kī fasl hai

apne lahū kā rañg bhī pahchāntī nahīñ

insān ke nasīb meñ andhoñ kī nasl hai

munsif to faisloñ kī tijārat meñ lag ga.e

ab jaane kis se ham ko taqāzā-e-adl hai

dushman kā hausla kabhī itnā qavī na thā

mere tabāh hone meñ terā bhī daḳhl hai

laḌte bhī haiñ to pyaar se muñh moḌte nahīñ

ham se kahīñ ziyāda to bachchoñ meñ aql hai

tārīḳh kah rahī hai ki chehra badal gayā

insān hai musir ki vahī apnī shakl hai

dāvā-e-ḳhūñ-bahā na tazallum na ehtijāj

kis be-navā-e-vaqt kā 'ibrat' ye qatl hai

ai mausam-e-junun ye ajab tarz-e-qatl hai

insaniyat ke kheton mein lashon ki fasl hai

apne lahu ka rang bhi pahchanti nahin

insan ke nasib mein andhon ki nasl hai

munsif to faislon ki tijarat mein lag gae

ab jaane kis se hum ko taqaza-e-adl hai

dushman ka hausla kabhi itna qawi na tha

mere tabah hone mein tera bhi daKHl hai

laDte bhi hain to pyar se munh moDte nahin

hum se kahin ziyaada to bachchon mein aql hai

tariKH kah rahi hai ki chehra badal gaya

insan hai musir ki wahi apni shakl hai

dawa-e-KHun-baha na tazallum na ehtijaj

kis be-nawa-e-waqt ka 'ibrat' ye qatl hai