ai mere dil tujhe pata hai kya

ai mire dil tujhe pata hai kyā

vo tire ġham se āshnā hai kyā

mujh meñ mātam kā shor kaisā hai

mere andar koī mirā hai kyā

sab se hañs ke gale jo miltā hai

shahr meñ vo nayā nayā hai kyā

zindagī dho ke roz piitā huuñ

aur piine ko kuchh bachā hai kyā

qissa-e-dil raqam karūñ kaise

ishq hai koī sāneha hai kyā

phal koī haath kyuuñ nahīñ aatā

qad meñ mujh se shajar baḌā hai kyā

tujh meñ uljhā huā maiñ rahtā huuñ

tū batā merā mas.ala hai kyā

kyuuñ mujhe DhūñDhtī hai purvā.ī

mere zaḳhmoñ se vāsta hai kyā

mujh ko jhūTā batā rahā hai jo

mere andar kā aa.ina hai kyā

kaun detā hai dastakeñ itnī

gum-shuda koī hādisa hai kyā

kaise ḳhurshīd us ko badloge

zindagī koī qāfiya hai kyā

ai mere dil tujhe pata hai kya

wo tere gham se aashna hai kya

mujh mein matam ka shor kaisa hai

mere andar koi mera hai kya

sab se hans ke gale jo milta hai

shahr mein wo naya naya hai kya

zindagi dho ke roz pita hun

aur pine ko kuchh bacha hai kya

qissa-e-dil raqam karun kaise

ishq hai koi saneha hai kya

phal koi hath kyun nahin aata

qad mein mujh se shajar baDa hai kya

tujh mein uljha hua main rahta hun

tu bata mera masala hai kya

kyun mujhe DhunDhti hai purwai

mere zaKHmon se wasta hai kya

mujh ko jhuTa bata raha hai jo

mere andar ka aaina hai kya

kaun deta hai dastaken itni

gum-shuda koi hadisa hai kya

kaise KHurshid us ko badloge

zindagi koi qafiya hai kya