ai rah-e-hijr-e-nau-faroz dekh ki hum Thahar gae

ai rah-e-hijr-e-nau-faroz dekh ki ham Thahar ga.e

ye bhī nahīñ ki zinda haiñ ye bhī nahīñ ki mar ga.e

ḳhvāb talak rihā.ī thī tere firāq-o-hijr se

aañkh khulī to aa.ine tah meñ kahīñ utar ga.e

tū bhī mirī tarah rahā dhyān uThā.e shahr kā

so.e to chhāñv so ga.ī qāfile kuuch kar ga.e

tujh ko bahut qarīb se dekh ke yuuñ lagā ki ab

ḳhema-e-jāñ ukhaḌ gayā dasht-e-talab guzar ga.e

dil kī gavāhī ke liye rasm-e-duā burī na thī

ranj-e-ḳhumār-e-be-samar DhūñDne us ke ghar ga.e

ham hī the vo balā-kashāñ dār-o-rasan the jin kī jaañ

ham hī the shab ke ham-safar ham hī na apne ghar ga.e

dil ko tire firāq kī aarzū yaad rah ga.ī

din vo mohabbatoñ ke bhī misl-e-rah-e-safar ga.e

mere liye bhī ḳhvāb the us ne rakhe hue kahīñ

shahr meñ un ko DhūñDne qāsid-e-be-hunar ga.e

ai rah-e-hijr-e-nau-faroz dekh ki hum Thahar gae

ye bhi nahin ki zinda hain ye bhi nahin ki mar gae

KHwab talak rihai thi tere firaq-o-hijr se

aankh khuli to aaine tah mein kahin utar gae

tu bhi meri tarah raha dhyan uThae shahr ka

soe to chhanw so gai qafile kuch kar gae

tujh ko bahut qarib se dekh ke yun laga ki ab

KHema-e-jaan ukhaD gaya dasht-e-talab guzar gae

dil ki gawahi ke liye rasm-e-dua buri na thi

ranj-e-KHumar-e-be-samar DhunDne us ke ghar gae

hum hi the wo bala-kashan dar-o-rasan the jin ki jaan

hum hi the shab ke ham-safar hum hi na apne ghar gae

dil ko tere firaq ki aarzu yaad rah gai

din wo mohabbaton ke bhi misl-e-rah-e-safar gae

mere liye bhi KHwab the us ne rakhe hue kahin

shahr mein un ko DhunDne qasid-e-be-hunar gae