ai sakhi likh diye hain nam un ke

ai sakhī likh diye haiñ naam un ke

rang holī ke giit phāgun ke

ai sakhī dekh kitne pyāre phuul

ham ko bheje haiñ un ne chun chun ke

ai sakhī paḌh na ḳhat sar-e-mahfil

ro na duuñ un ke aane kā sun ke

ai sakhī tez dhuup vo aur maiñ

aur ghane saa.e peḌ jāmun ke

ai sakhī maat honā pakkī hai

kyā batā.ūñ tujhe maiñ daañv un ke

ai sakhī aaj bhī ye raat kahīñ

biit jaa.e na 'ḳhvāb' bun bun ke

ai sakhi likh diye hain nam un ke

rang holi ke git phagun ke

ai sakhi dekh kitne pyare phul

hum ko bheje hain un ne chun chun ke

ai sakhi paDh na KHat sar-e-mahfil

ro na dun un ke aane ka sun ke

ai sakhi tez dhup wo aur main

aur ghane sae peD jamun ke

ai sakhi mat hona pakki hai

kya bataun tujhe main danw un ke

ai sakhi aaj bhi ye raat kahin

bit jae na 'KHwab' bun bun ke