ai sanam sab hain tere hathon se nalan aaj-kal

ai sanam sab haiñ tire hāthoñ se nālāñ āj-kal

sūrat-e-nāqūs haiñ gabr-o-musalmāñ āj-kal

baaġh meñ kahte haiñ vo laale kā taḳhta dekh kar

gul khilātī hai ajab ḳhāk-e-shahīdāñ āj-kal

harf-e-matlab apne dīvāne kā bhī sun jā zarā

ho tujhe chhuTTī jo ai tifl-e-dabistāñ āj-kal

mausam-e-josh-e-junūñ hai jāma-e-gul kī tarah

ḳhud-ba-ḳhud hote haiñ TukḌe jeb-o-dastāñ āj-kal

peshtar ḳhat se mazā thā husn kā ai naunihāl

ho gayā dāġhī tirā seb-e-zanaḳhdāñ āj-kal

yaad karte haiñ kisī ke mus.haf-e-ruḳhsār ko

tāq-e-nisyāñ par rakhā hai ham ne qur.āñ āj-kal

zulfeñ chhoḌī haiñ jo us sayyād-e-gul-ruḳhsār ne

daam meñ phañste haiñ murġhān-e-ġhulistāñ āj-kal

haa.e vo ḳhush-qad pa.e-gul-gasht ab aatā nahīñ

naḳhl-e-mātam hai har ik sarv-e-gulistāñ āj-kal

zo.af ke hāthoñ hue fasl-e-junūñ meñ tañg ham

ho gayā phāñsī hameñ apnā garebāñ āj-kal

in dinoñ meñ zuur hotā hai hameñ josh-e-junūñ

bhāgtā hai chhoḌ kar majnūñ bayābāñ āj-kal

jo hasīñ hai gard hai is bādshāh-e-husn kī

rahtā hai pariyoñ kī jhūmar meñ sulaimāñ āj-kal

aiñDate haiñ kaj-adā.ī karte haiñ ushshāq se

bal kī lete haiñ bahut gesū-e-jānāñ āj-kal

gulshan-e-ālam mirī nazroñ meñ bāġh-e-sabz hai

dekhtā huuñ sabza-e-gor-e-ġharebāñ āj-kal

sāmnā har roz kā hai us but-e-saffāk se

ai 'sabā' allāh hai apnā nigahbāñ āj-kal

ai sanam sab hain tere hathon se nalan aaj-kal

surat-e-naqus hain gabr-o-musalman aaj-kal

bagh mein kahte hain wo lale ka taKHta dekh kar

gul khilati hai ajab KHak-e-shahidan aaj-kal

harf-e-matlab apne diwane ka bhi sun ja zara

ho tujhe chhuTTi jo ai tifl-e-dabistan aaj-kal

mausam-e-josh-e-junun hai jama-e-gul ki tarah

KHud-ba-KHud hote hain TukDe jeb-o-dastan aaj-kal

peshtar KHat se maza tha husn ka ai naunihaal

ho gaya daghi tera seb-e-zanaKHdan aaj-kal

yaad karte hain kisi ke mushaf-e-ruKHsar ko

taq-e-nisyan par rakha hai hum ne quran aaj-kal

zulfen chhoDi hain jo us sayyaad-e-gul-ruKHsar ne

dam mein phanste hain murghan-e-ghulistan aaj-kal

hae wo KHush-qad pae-gul-gasht ab aata nahin

naKHl-e-matam hai har ek sarw-e-gulistan aaj-kal

zoaf ke hathon hue fasl-e-junun mein tang hum

ho gaya phansi hamein apna gareban aaj-kal

in dinon mein zur hota hai hamein josh-e-junun

bhagta hai chhoD kar majnun bayaban aaj-kal

jo hasin hai gard hai is baadshah-e-husn ki

rahta hai pariyon ki jhumar mein sulaiman aaj-kal

ainDate hain kaj-adai karte hain ushshaq se

bal ki lete hain bahut gesu-e-jaanan aaj-kal

gulshan-e-alam meri nazron mein bagh-e-sabz hai

dekhta hun sabza-e-gor-e-ghareban aaj-kal

samna har roz ka hai us but-e-saffak se

ai 'saba' allah hai apna nigahban aaj-kal