ai shah-e-be-KHudi kabhi diwana kar mujhe

ai shāh-e-be-ḳhudī kabhī dīvāna kar mujhe

jab ho chukūñ divāna to achchhā na kar mujhe

āñkhoñ ko merī apnī basārat pe naaz ho

jab sāmne vo aa.e to andhā na kar mujhe

ab aur kitnī baar chalūñ pul-sirāt par

vāpas bulā le phir kabhī paidā na kar mujhe

ai paikar-e-fanā ye tirā inzimām hai

dariyā banā huuñ qatre se royā na kar mujhe

mustaġhraq-e-junūn-e-ta.ayyush meñ jab rahūñ

ai raqs-e-zāt sab kā tamāshā na kar mujhe

rahne na de junūñ mirā mujh ko sukūn se

dast-e-shifā de aur masīhā na kar mujhe

ai shah-e-be-KHudi kabhi diwana kar mujhe

jab ho chukun diwana to achchha na kar mujhe

aankhon ko meri apni basarat pe naz ho

jab samne wo aae to andha na kar mujhe

ab aur kitni bar chalun pul-siraat par

wapas bula le phir kabhi paida na kar mujhe

ai paikar-e-fana ye tera inzimam hai

dariya bana hun qatre se roya na kar mujhe

mustaghraq-e-junun-e-tayyush mein jab rahun

ai raqs-e-zat sab ka tamasha na kar mujhe

rahne na de junun mera mujh ko sukun se

dast-e-shifa de aur masiha na kar mujhe