ai shoala-ruKH itna hai tera rang-e-badan surKH

ai sho.ala-ruḳh itnā hai tirā rang-e-badan surḳh

pahne hai safed aur nazar aatī hai chikan surḳh

kyā tere shahīdoñ meñ huā ḳhuun lagā kar

kis vāste hai lāla-e-hamrā hama-tan surḳh

nīlam hai dharā huqqa-e-yāqūt meñ goyā

haiñ daañt siyah missī se paañ se hai dahan surḳh

qatroñ meñ araq ke hai ayaañ rang badan kā

dekhā na gayā aaj talak durr-e-adan surḳh

kyūñkar dil-e-ḳhūnī ko nigal jaa.eñ na gesū

hotā hai kahā karte haiñ sab saañp kā man surḳh

nāzuk to hai jism us kā magar rang hai lālīñ

vo dekh le jis ne ki na dekhā ho saman surḳh

zāhid tujhe gar surḳh-rū hone kī havas hai

kar detī hai chehre ko mai-e-nāb-e-kuhan surḳh

kushta maiñ huā huuñ tirī gul-pairahanī par

lāzim hai mirī laash ko deñ log kafan surḳh

mar kar bhī rahe ḳhuun ke ashk āñkhoñ se jaarī

ai 'sehr' milā hijr kī daulat se kafan surḳh

ai shoala-ruKH itna hai tera rang-e-badan surKH

pahne hai safed aur nazar aati hai chikan surKH

kya tere shahidon mein hua KHun laga kar

kis waste hai lala-e-hamra hama-tan surKH

nilam hai dhara huqqa-e-yaqut mein goya

hain dant siyah missi se pan se hai dahan surKH

qatron mein araq ke hai ayan rang badan ka

dekha na gaya aaj talak durr-e-adan surKH

kyunkar dil-e-KHuni ko nigal jaen na gesu

hota hai kaha karte hain sab sanp ka man surKH

nazuk to hai jism us ka magar rang hai lalin

wo dekh le jis ne ki na dekha ho saman surKH

zahid tujhe gar surKH-ru hone ki hawas hai

kar deti hai chehre ko mai-e-nab-e-kuhan surKH

kushta main hua hun teri gul-pairahani par

lazim hai meri lash ko den log kafan surKH

mar kar bhi rahe KHun ke ashk aankhon se jari

ai 'sehr' mila hijr ki daulat se kafan surKH