ai sitam-azma jafa kab tak

ai sitam-āzmā jafā kab tak

kushta-e-zindagī vafā kab tak

garmī-e-koshish-e-jafā kab tak

dāvā-e-shohrat-e-vafā kab tak

ai dil-e-zohd-ḳhū riyā kab tak

nā-murādāna mudda.ā kab tak

ek meñ mil gayā ḳhudā maarā

yuuñ nibāhegā dūsrā kab tak

imtihāñ par ye imtihāñ tā-chand

aazmā āzmā.egā kab tak

hasrat aa.egī dam meñ sau sau baar

ai havas shor-e-marhabā kab tak

qudrat-e-sabr āqibat kitnī

jur.at-e-tāqat-āzmā kab tak

tum samajh jaao merī ḳhāmoshī

na kahūñ kahiye mudda.ā kab tak

kījiye ab mire nibāh kī fikr

yaar sabr-e-gurez-pā kab tak

ḳhvāb meñ bhī vo ā.eñge tā-chand

maiñ milā bhī to yuuñ milā kab tak

dil meñ kab tak tumhāre khaTkūñgā

chashm-e-dushman meñ merī jā kab tak

tandurustī-e-dil hai be-jānī

dard-e-be-dard kī davā kab tak

tark kī saaf us ne goyā.ī

nargis-e-surma-sā ḳhafā kab tak

ai dil-e-be-qarār-o-be-ārām

naala tā-chand tā-kujā kab tak

ai 'qalaq' vasl meñ bhī huuñ nāshād

tāla-e-nā-rasā rasā kab tak

ai sitam-azma jafa kab tak

kushta-e-zindagi wafa kab tak

garmi-e-koshish-e-jafa kab tak

dawa-e-shohrat-e-wafa kab tak

ai dil-e-zohd-KHu riya kab tak

na-muradana muddaa kab tak

ek mein mil gaya KHuda mara

yun nibahega dusra kab tak

imtihan par ye imtihan ta-chand

aazma aazmaega kab tak

hasrat aaegi dam mein sau sau bar

ai hawas shor-e-marhaba kab tak

qudrat-e-sabr aaqibat kitni

jurat-e-taqat-azma kab tak

tum samajh jao meri KHamoshi

na kahun kahiye muddaa kab tak

kijiye ab mere nibah ki fikr

yar sabr-e-gurez-pa kab tak

KHwab mein bhi wo aaenge ta-chand

main mila bhi to yun mila kab tak

dil mein kab tak tumhaare khaTkunga

chashm-e-dushman mein meri ja kab tak

tandurusti-e-dil hai be-jaani

dard-e-be-dard ki dawa kab tak

tark ki saf us ne goyai

nargis-e-surma-sa KHafa kab tak

ai dil-e-be-qarar-o-be-aram

nala ta-chand ta-kuja kab tak

ai 'qalaq' wasl mein bhi hun nashad

tala-e-na-rasa rasa kab tak