ai subh-e-umid der kya hai

ai sub.h-e-umīd der kyā hai

ab kitne diyoñ kā fāsla hai

ab kitnī hai der raushnī meñ

ab kitnī shaboñ kā marhala hai

ham hijr kī raat ke musāfir

is dasht se ham ko kyā milā hai

vo ḳhvāb to jal-bujhe haiñ saare

vo ḳhema to raakh ho chalā hai

ab kaise charāġh kyā charāġhāñ

jab saarā vajūd jal rahā hai

bāhar bhī vahī fazā hai saarī

indar bhī mire vahī ḳhalā hai

ik dil hai aur itnī qatl-gāheñ

jo raah chalo vo karbalā hai

vo daur hai ye ki sunñe vaalā

har lafz ko chhū ke dekhtā hai

itne jo azaab utar rahe haiñ

is shahr ko kis kī bad-duā hai

ai subh-e-umid der kya hai

ab kitne diyon ka fasla hai

ab kitni hai der raushni mein

ab kitni shabon ka marhala hai

hum hijr ki raat ke musafir

is dasht se hum ko kya mila hai

wo KHwab to jal-bujhe hain sare

wo KHema to rakh ho chala hai

ab kaise charagh kya charaghan

jab sara wajud jal raha hai

bahar bhi wahi faza hai sari

indar bhi mere wahi KHala hai

ek dil hai aur itni qatl-gahen

jo rah chalo wo karbala hai

wo daur hai ye ki sunne wala

har lafz ko chhu ke dekhta hai

itne jo azab utar rahe hain

is shahr ko kis ki bad-dua hai