ai umr-e-rawan garmi-e-raftar kahan tak

ai umr-e-ravāñ garmī-e-raftār kahāñ tak

gardish meñ raheñ sūrat-e-parkār kahāñ tak

paivand-e-junūñ zīnat-e-poshāk-e-ḳhirad ho

dāman tire yūsuf kā rahe taar kahāñ tak

dariyā ko milīñ bheñT meñ shahzādiyāñ lekin

badle meñ hameñ vādī-e-pur-ḳhār kahāñ tak

ab kashtī-e-jāñ paas ke sāhil se lagā deñ

siine pe saheñ vaqt kī patvār kahāñ tak

paimāna-e-dil diid se bhar jā.egā āḳhir

minnat-kash-e-sāqī rahe mai-ḳhvār kahāñ tak

darvesh ko darpesh jo amboh-e-sagāñ ho

ādāb-e-faqīrī hoñ asar-dār kahāñ tak

mashkīza vahī pyaas kā aalam bhī vahī hai

hai ishq meñ sahrā kā ye kirdār kahāñ tak

ai umr-e-rawan garmi-e-raftar kahan tak

gardish mein rahen surat-e-parkar kahan tak

paiwand-e-junun zinat-e-poshak-e-KHirad ho

daman tere yusuf ka rahe tar kahan tak

dariya ko milin bhenT mein shahzadiyan lekin

badle mein hamein wadi-e-pur-KHar kahan tak

ab kashti-e-jaan pas ke sahil se laga den

sine pe sahen waqt ki patwar kahan tak

paimana-e-dil did se bhar jaega aaKHir

minnat-kash-e-saqi rahe mai-KHwar kahan tak

darwesh ko darpesh jo amboh-e-sagan ho

aadab-e-faqiri hon asar-dar kahan tak

mashkiza wahi pyas ka aalam bhi wahi hai

hai ishq mein sahra ka ye kirdar kahan tak