ai yar mujh afsurada-e-hijran ko pahunch tu

ai yaar mujh afsurada-e-hijrāñ ko pahuñch tū

ai rashk-e-masīhā tan-e-be-jāñ ko pahuñch tū

fariyād-kash ik bose kā huuñ tere laboñ se

ai surma misī ke mirī afġhāñ ko pahuñch tū

gar ātish-e-dil nāloñ kī sarsar se na sulge

mat sard ho dāmān-e-bayābāñ ko pahuñch to

bikhre haiñ sharar dil ke mire dūd-e-fuġhāñ meñ

apne hī sar-e-zulf-e-zar-afshāñ ko pahuñch tū

shāyad ki ho is bāġhī chaman miir kā manzūr

shabnam ho ke ai ashk gulistāñ ko pahuñch tū

gar chaah hai sarsabzī-e-baḳhtoñ kī divāne

atfāl ke pathrāv kī bārāñ ko pahuñch tū

pur-zañg hai ā.īna-e-dil hind se 'uzlat'

gar chāhiye saf haañ to safāhāñ ko pahuñch tū

ai yar mujh afsurada-e-hijran ko pahunch tu

ai rashk-e-masiha tan-e-be-jaan ko pahunch tu

fariyaad-kash ek bose ka hun tere labon se

ai surma misi ke meri afghan ko pahunch tu

gar aatish-e-dil nalon ki sarsar se na sulge

mat sard ho daman-e-bayaban ko pahunch to

bikhre hain sharar dil ke mere dud-e-fughan mein

apne hi sar-e-zulf-e-zar-afshan ko pahunch tu

shayad ki ho is baghi chaman mir ka manzur

shabnam ho ke ai ashk gulistan ko pahunch tu

gar chah hai sarsabzi-e-baKHton ki diwane

atfal ke pathraw ki baran ko pahunch tu

pur-zang hai aaina-e-dil hind se 'uzlat'

gar chahiye saf han to safahan ko pahunch tu