ain mashhur hai tera ye chalan rah-guzar

'ain mash.hūr hai terā ye chalan rāh-guzar

har musāfir ko milī tujh se thakan rāh-guzar

sā.ebāñ sar pe shajar koī na saayā koī

aur phir us pe ye sūraj kī tapan rāh-guzar

ab karam koī to farmā ki sukūñ aa jaa.e

kaise kam ho mire talvoñ kī jalan rāh-guzar

aap rahbar huuñ mirā qāfila-sālār bhī maiñ

baḌhte jaate haiñ mire paañv magan rāhguzar

chalte chalte maiñ bahut duur nikal aayā huuñ

jaane kis or hai ye bāġh-e-‘adan rāh-guzar

kah zarā bād-e-sabā se ki uḌā le jaa.e

le ke baiThā huuñ maiñ miTTī kā badan rāh-guzar

dil ko dhaḌkā sā lagā hai na kahīñ bhar jaa.e

ab to ristā bhī nahīñ zaḳhm-e-kuhan rāh-guzar

ham yuuñ nikle the ki juuñ sair-e-chaman ko nikle

sū-e-maqtal jo chale sar-ba-kafan rāhguzar

gāmzan aise safar par thā 'karan' bil-āḳhir

us kī manzil thī faqat dār-o-rasan rāh-guzar

'ain mashhur hai tera ye chalan rah-guzar

har musafir ko mili tujh se thakan rah-guzar

saeban sar pe shajar koi na saya koi

aur phir us pe ye suraj ki tapan rah-guzar

ab karam koi to farma ki sukun aa jae

kaise kam ho mere talwon ki jalan rah-guzar

aap rahbar hun mera qafila-salar bhi main

baDhte jate hain mere panw magan rahguzar

chalte chalte main bahut dur nikal aaya hun

jaane kis or hai ye bagh-e-‘adan rah-guzar

kah zara baad-e-saba se ki uDa le jae

le ke baiTha hun main miTTi ka badan rah-guzar

dil ko dhaDka sa laga hai na kahin bhar jae

ab to rista bhi nahin zaKHm-e-kuhan rah-guzar

hum yun nikle the ki jun sair-e-chaman ko nikle

su-e-maqtal jo chale sar-ba-kafan rahguzar

gamzan aise safar par tha 'karan' bil-aKHir

us ki manzil thi faqat dar-o-rasan rah-guzar