aisa hone nahin deta tha magar hone ko hai

aisā hone nahīñ detā thā magar hone ko hai

zindagī ab to na jiine meñ basar hone ko hai

par jo kaaTe ga.e jā phaile havāoñ meñ tamām

apnī parvāz ba-andāz-e-digar hone ko hai

vahshat-e-dil tujhe le kar maiñ kahāñ jā.ūñ batā

rahte rahte to ye vīrāna bhī ghar hone ko hai

dil se phir khel rahī haiñ vahī ziddī yādeñ

zarra zarra mirā phir zer-o-zabar hone ko hai

sham.a kī lau kī tarah jaan Dhalī jaatī hai aaj

shāyad apnī shab-e-ġham kī bhī sahar hone ko hai

suraḳh-rū ḳhūn-e-jigar se hī huā karte haiñ log

kyā hai 'bilqīs' agar jaañ kā zarar hone ko hai

aisa hone nahin deta tha magar hone ko hai

zindagi ab to na jine mein basar hone ko hai

par jo kaTe gae ja phaile hawaon mein tamam

apni parwaz ba-andaz-e-digar hone ko hai

wahshat-e-dil tujhe le kar main kahan jaun bata

rahte rahte to ye virana bhi ghar hone ko hai

dil se phir khel rahi hain wahi ziddi yaaden

zarra zarra mera phir zer-o-zabar hone ko hai

shama ki lau ki tarah jaan Dhali jati hai aaj

shayad apni shab-e-gham ki bhi sahar hone ko hai

suraKH-ru KHun-e-jigar se hi hua karte hain log

kya hai 'bilqis' agar jaan ka zarar hone ko hai