aisa lagta hai wo nadan samajhte hain mujhe

aisā lagtā hai vo nādān samajhte haiñ mujhe

jo bhī tafrīh kā sāmān samajhte haiñ mujhe

ḳhairiyat bhī mirī mā'lūm nahīñ karte haiñ

is-qadar log pareshān samajhte haiñ mujhe

shahr se aao to aane kā sabab pūchhte haiñ

gaañv ke log bhī mehmān samajhte haiñ mujhe

is liye merī ḳhushāmad nahīñ kartā koī

sab manānā bahut āsān samajhte haiñ mujhe

maiñ huuñ fankār to fankār hī samjhā jaa.e

aap kyoñ hindū musalmān samajhte haiñ mujhe

maiñ ne har zaḳhm pe marham kī numā.ish kī hai

jaane kyoñ log namakdān samajhte haiñ mujhe

log kyā kahte haiñ parvāh nahīñ hai 'ālam'

itnā kaafī hai ki insān samajhte haiñ mujhe

aisa lagta hai wo nadan samajhte hain mujhe

jo bhi tafrih ka saman samajhte hain mujhe

KHairiyat bhi meri ma'lum nahin karte hain

is-qadar log pareshan samajhte hain mujhe

shahr se aao to aane ka sabab puchhte hain

ganw ke log bhi mehman samajhte hain mujhe

is liye meri KHushamad nahin karta koi

sab manana bahut aasan samajhte hain mujhe

main hun fankar to fankar hi samjha jae

aap kyon hindu musalman samajhte hain mujhe

main ne har zaKHm pe marham ki numaish ki hai

jaane kyon log namakdan samajhte hain mujhe

log kya kahte hain parwah nahin hai 'alam'

itna kafi hai ki insan samajhte hain mujhe