aisa mat kah ki yahan tu ghalati se aaya

aisā mat kah ki yahāñ tū ġhalatī se aayā

dil vo hujra hai jahāñ ġham bhī ḳhushī se aayā

ḳhāmushī aa.ī darīda-dahanī se terī

dekhnā mujh ko tirī kam-nazarī se aayā

fat.h-mandī kā jo ik rang hai is chehre par

surḳh-rūī se nahīñ dil-shikanī se aayā

varna rāheñ to mirī samt ka.ī aatī thiiñ

us ko 'ujlat thī so be-rāh-ravī se aayā

ab koī rok rahā ho to maiñ ruk jaatā huuñ

mujh meñ ye vasf ġharīb-ul-vatanī se aayā

maut kā ḳhauf baḌā ḳhauf hai lekin 'javvād'

jo mujhe us kī tavajjoh meñ kamī se aayā

aisa mat kah ki yahan tu ghalati se aaya

dil wo hujra hai jahan gham bhi KHushi se aaya

KHamushi aai darida-dahani se teri

dekhna mujh ko teri kam-nazari se aaya

fath-mandi ka jo ek rang hai is chehre par

surKH-rui se nahin dil-shikani se aaya

warna rahen to meri samt kai aati thin

us ko 'ujlat thi so be-rah-rawi se aaya

ab koi rok raha ho to main ruk jata hun

mujh mein ye wasf gharib-ul-watani se aaya

maut ka KHauf baDa KHauf hai lekin 'jawwad'

jo mujhe us ki tawajjoh mein kami se aaya