aisa nahin ke wasl ka lamha na aaega

aisā nahīñ ke vasl kā lamha na aa.egā

lekin is intizār ke jaisā na aa.egā

ye lab hī kyā ye āñkheñ bhī ab pūchhne lagīñ

is rāste meñ kyā koī dariyā na aa.egā

baiThe raho udaas yuuñ zulfoñ ko khol kar

is rut meñ to havāoñ kā jhoñkā na aa.egā

pahle se ham batā deñ ki aa.egā saarā jism

dil tum pe aa.egā to akelā na aa.egā

aa.e nahīñ ki karne lage lauTne kī baat

tum hī batāo aise meñ ġhussa na aa.egā

bastī ke saare bachchoñ ko kaise batā.ūñ maiñ

ab vo khilaune bechne vaalā na aa.egā

so jaao ai darḳhto ki Dhalne lagī hai raat

chhoḌo umiid ab vo parinda na aa.egā

aisa nahin ke wasl ka lamha na aaega

lekin is intizar ke jaisa na aaega

ye lab hi kya ye aankhen bhi ab puchhne lagin

is raste mein kya koi dariya na aaega

baiThe raho udas yun zulfon ko khol kar

is rut mein to hawaon ka jhonka na aaega

pahle se hum bata den ki aaega sara jism

dil tum pe aaega to akela na aaega

aae nahin ki karne lage lauTne ki baat

tum hi batao aise mein ghussa na aaega

basti ke sare bachchon ko kaise bataun main

ab wo khilaune bechne wala na aaega

so jao ai darKHto ki Dhalne lagi hai raat

chhoDo umid ab wo parinda na aaega