aise aalam mein guzari ki guzari na gai

aise aalam meñ guzārī ki guzārī na ga.ī

zindagī ham se kisī taur sañvārī na ga.ī

jab kisī bazm-e-tarab-nāk meñ jaanā chāhā

ḳhil.at-e-ranj-o-alam tan se utārī na ga.ī

maiñ us iqlīm-e-mohabbat kā huuñ shahzāda jahāñ

juz tire aur koī rāj-kumārī na ga.ī

mere hoñToñ ne tabassum kī adā siikh to lī

merī āñkhoñ se magar girya-o-zārī na ga.ī

tujh se bichhḌe haiñ magar ishq kahāñ ḳhatm huā

ye vo jiitī huī baazī hai jo haarī na ga.ī

tū hai vo ḳhvāb jo āñkhoñ se utārā na gayā

tū vo ḳhvāhish hai jo ham se kabhī maarī na ga.ī

aise aalam mein guzari ki guzari na gai

zindagi hum se kisi taur sanwari na gai

jab kisi bazm-e-tarab-nak mein jaana chaha

KHilat-e-ranj-o-alam tan se utari na gai

main us iqlim-e-mohabbat ka hun shahzada jahan

juz tere aur koi raj-kumari na gai

mere honTon ne tabassum ki ada sikh to li

meri aankhon se magar girya-o-zari na gai

tujh se bichhDe hain magar ishq kahan KHatm hua

ye wo jiti hui bazi hai jo haari na gai

tu hai wo KHwab jo aankhon se utara na gaya

tu wo KHwahish hai jo hum se kabhi mari na gai