aise jazbaat mein lahje ko na patthar kije

aise jazbāt meñ lahje ko na patthar kiije

guftugū mujh se zarā aap sambhal kar kiije

ye na ho aap kī tahrīr hī bāġhī ho jaa.e

zulm itnā bhī na qirtās-o-qalam par kiije

mujh se ranjish hai to maidān meñ aa jā.iye aap

merī tasvīr ke TukḌe na bahattar kiije

merā da.avā hai ki hālāt badal jā.eñge

sāmnā aap jo hālāt kā DaT kar kiije

chāhte aap haiñ jo zehn kushāda rakhnā

buġhz-o-nafrat ke ḳhayālāt ko bāhar kiije

dūsroñ par to karam aap kā rahtā hai magar

ik nazar merī bhī jānib mire dilbar kiije

baat bantī hai mohabbat se bhī aksar 'rahbar'

dil meñ paivast na alfāz ke nashtar kiije

aise jazbaat mein lahje ko na patthar kije

guftugu mujh se zara aap sambhal kar kije

ye na ho aap ki tahrir hi baghi ho jae

zulm itna bhi na qirtas-o-qalam par kije

mujh se ranjish hai to maidan mein aa jaiye aap

meri taswir ke TukDe na bahattar kije

mera dawa hai ki haalat badal jaenge

samna aap jo haalat ka DaT kar kije

chahte aap hain jo zehn kushada rakhna

bughz-o-nafrat ke KHayalat ko bahar kije

dusron par to karam aap ka rahta hai magar

ek nazar meri bhi jaanib mere dilbar kije

baat banti hai mohabbat se bhi aksar 'rahbar'

dil mein paiwast na alfaz ke nashtar kije