aish jis ghar mein mayassar tha wo ghar yaad nahin

aish jis ghar meñ mayassar thā vo ghar yaad nahīñ

ab to vīrāne meñ suntā koī fariyād nahīñ

kaun hai vo jo tire ishq meñ barbād nahīñ

kaun furqat meñ tirī mā.il-e-fariyād nahīñ

husn be-misl thā be-misl thī har shān-e-jamāl

unheñ sau martaba dekhā hai magar yaad nahīñ

dār-e-fānī tujhe detā hai fareb-e-ta.amīr

hai ye vīrān-sarā koī ghar ābād nahīñ

tū jise chāhe use hogā do-ālam meñ uruuj

tū jise chāhe vo kaunain meñ barbād nahīñ

aish bachpan kā rakhūñ yaad maiñ kyoñ piirī meñ

jab javānī kā mujhe lutf 'umar' yaad nahīñ

aish jis ghar mein mayassar tha wo ghar yaad nahin

ab to virane mein sunta koi fariyaad nahin

kaun hai wo jo tere ishq mein barbaad nahin

kaun furqat mein teri mail-e-fariyaad nahin

husn be-misl tha be-misl thi har shan-e-jamal

unhen sau martaba dekha hai magar yaad nahin

dar-e-fani tujhe deta hai fareb-e-tamir

hai ye viran-sara koi ghar aabaad nahin

tu jise chahe use hoga do-alam mein uruj

tu jise chahe wo kaunain mein barbaad nahin

aish bachpan ka rakhun yaad main kyon piri mein

jab jawani ka mujhe lutf 'umar' yaad nahin