aisi bhi surat-e-haalat na samjhi jae

aisī bhī sūrat-e-hālāt na samjhī jaa.e

merī paspā.ī mirī maat na samjhī jaa.e

ye to raste mujhe le aa.e haiñ terī jānib

ye mulāqāt mulāqāt na samjhī jaa.e

ba.az auqāt maiñ nashshe meñ nahīñ bhī hotā

merī har baat mirī baat na samjhī jaa.e

ab to sahrā bhī mire saath safar karte haiñ

sirf vahshat hī mire saath na samjhī jaa.e

faisle saare kahīñ aur huā karte haiñ

merī rusvā.ī mire haath na samjhī jaa.e

vaqt aane pe galā apnā dabā saktā huuñ

itnī kamzor mirī zaat na samjhī jaa.e

aisi bhi surat-e-haalat na samjhi jae

meri paspai meri mat na samjhi jae

ye to raste mujhe le aae hain teri jaanib

ye mulaqat mulaqat na samjhi jae

baz auqat main nashshe mein nahin bhi hota

meri har baat meri baat na samjhi jae

ab to sahra bhi mere sath safar karte hain

sirf wahshat hi mere sath na samjhi jae

faisle sare kahin aur hua karte hain

meri ruswai mere hath na samjhi jae

waqt aane pe gala apna daba sakta hun

itni kamzor meri zat na samjhi jae