aisi qismat wo sunen yun mere afsane ko

aisī qismat vo suneñ yuuñ mire afsāne ko

ishq ko mil ga.ī ik chiiz qasam khāne ko

kuchh samajhtā hī nahīñ aag meñ jal jaane ko

sham.a parvāna banā detī hai parvāne ko

ātish-e-rashk na phūñke tire dīvāne ko

jalte dekhā nahīñ parvāne se parvāne ko

sham.a lahrā ke baḌhī aap lipaT jaane ko

mil ga.ī dād-e-vafā mil ga.ī parvāne ko

terī rahmat tire insāf kā muñh taktī hai

kah na de mujh se jahannum meñ chale jaane ko

ishq hī hai vo sahīfa ki hai apnī tafsīr

daḳhl is meñ na samajhne ko hai na samjhāne ko

is tarah us ne mire shīsha-e-dil ko toḌā

chhoḌ de jaan ke jaise koī paimāne ko

hashr meñ bhī na khulī aisī zabāñ band huī

aah kyā aap ne samjhā diyā dīvāne ko

maiñ vo kuchh kar ke chalā huuñ jo rukī merī zabāñ

ishq dohrā.e hamesha mire afsāne ko

abhī mahmil abhī tasvīr abhī jalva abhī tū

nazar aate haiñ ye aalam mire afsāne ko

mujh akele pe vo biitī jo zamāne pe banī

kahiye duniyā kī kahānī mire afsāne ko

kahīñ ik buuñd meñ chhalke kahīñ bhar hī na sake

koī samjhā hī na taqdīr ke paimāne ko

aah ḳhurshīd-e-qayāmat bhī hai bujhtā sā charāġh

raushnī chāhiye is dil ke siyah-ḳhāne ko

mere mashrab meñ to hai mai kī tarah ḳhuuñ bhī harām

kyā karūñ dil ke chhalakte hue paimāne ko

zarra zarra hai yahāñ TuuTe hue dil kā javāb

kahte haiñ dard kī duniyā mire dīvāne ko

huuñ vo kashtī ki huuñ maujoñ ke talātum meñ nihāñ

Duub jaane ko kahūñ maiñ ki ubhar jaane ko

aisi qismat wo sunen yun mere afsane ko

ishq ko mil gai ek chiz qasam khane ko

kuchh samajhta hi nahin aag mein jal jaane ko

shama parwana bana deti hai parwane ko

aatish-e-rashk na phunke tere diwane ko

jalte dekha nahin parwane se parwane ko

shama lahra ke baDhi aap lipaT jaane ko

mil gai dad-e-wafa mil gai parwane ko

teri rahmat tere insaf ka munh takti hai

kah na de mujh se jahannum mein chale jaane ko

ishq hi hai wo sahifa ki hai apni tafsir

daKHl is mein na samajhne ko hai na samjhane ko

is tarah us ne mere shisha-e-dil ko toDa

chhoD de jaan ke jaise koi paimane ko

hashr mein bhi na khuli aisi zaban band hui

aah kya aap ne samjha diya diwane ko

main wo kuchh kar ke chala hun jo ruki meri zaban

ishq dohrae hamesha mere afsane ko

abhi mahmil abhi taswir abhi jalwa abhi tu

nazar aate hain ye aalam mere afsane ko

mujh akele pe wo biti jo zamane pe bani

kahiye duniya ki kahani mere afsane ko

kahin ek bund mein chhalke kahin bhar hi na sake

koi samjha hi na taqdir ke paimane ko

aah KHurshid-e-qayamat bhi hai bujhta sa charagh

raushni chahiye is dil ke siyah-KHane ko

mere mashrab mein to hai mai ki tarah KHun bhi haram

kya karun dil ke chhalakte hue paimane ko

zarra zarra hai yahan TuTe hue dil ka jawab

kahte hain dard ki duniya mere diwane ko

hun wo kashti ki hun maujon ke talatum mein nihan

Dub jaane ko kahun main ki ubhar jaane ko