ajab andheri raat ka nazara tha

'ajab añdherī raat kā nazāra thā

zamīn aañkh thī falak sitāra thā

vo kaun haath hogā jis ne pahlī baar

charāġh ūñche taaq se utārā thā

jo sirf ḳhushkiyoñ ke rahne vaale the

samundar un kā āḳhirī sahārā thā

maiñ pāniyoñ ke pahle marhale talak

jahāñ pe vo thā tīsrā kināra thā

jalī thiiñ sirf chaar chhe 'imārateñ

lapeT meñ agarche shahr saarā thā

vahī makān jis ke baam par kabhī

ik aa.ine kā 'aks be-sahārā thā

vahī darīcha jis kī chhāñv meñ kabhī

maiñ apnī saarī kā.enāt haarā thā

vahī jagah hai jis jagah tujhe kabhī

tire purāne naam se pukārā thā

magar kise batā.eñ kaun mānegā

vo ḳhvāb raat aañkh meñ dobāra thā

phir ik safar ke baa'd dūsrā safar

ye baat mānñe kā kis ko yaarā thā

phir ek 'umr bītne ke bāvajūd

vahīñ khaḌā thā maiñ vahī nazāra thā

'ajab andheri raat ka nazara tha

zamin aankh thi falak sitara tha

wo kaun hath hoga jis ne pahli bar

charagh unche taq se utara tha

jo sirf KHushkiyon ke rahne wale the

samundar un ka aaKHiri sahaara tha

main paniyon ke pahle marhale talak

jahan pe wo tha tisra kinara tha

jali thin sirf chaar chhe 'imaraten

lapeT mein agarche shahr sara tha

wahi makan jis ke baam par kabhi

ek aaine ka 'aks be-sahaara tha

wahi daricha jis ki chhanw mein kabhi

main apni sari kaenat haara tha

wahi jagah hai jis jagah tujhe kabhi

tere purane nam se pukara tha

magar kise bataen kaun manega

wo KHwab raat aankh mein dobara tha

phir ek safar ke ba'd dusra safar

ye baat manne ka kis ko yara tha

phir ek 'umr bitne ke bawajud

wahin khaDa tha main wahi nazara tha