ajab apni haalat ye hum dekhte hain

'ajab apnī hālat ye ham dekhte haiñ

ki āñkhoñ ko har lamha nam dekhte haiñ

lagā.eñ to kyā aisī duniyā se dil ham

musalsal jahāñ ġham pe ġham dekhte haiñ

daraḳhtoñ samundar havā aur falak par

'ajab us kā jāh-o-hasham dekhte haiñ

jo rahtā hai shah-rag meñ apnī usī ko

na tum dekhte ho na ham dekhte haiñ

ham apne chaman-zār-e-hastī pe ik din

sitam-zār-e-mulk-e-‘adam dekhte haiñ

vo nā-mehrbāñ mehrbāñ ho gayā hai

qadam do qadam chal ke ham dekhte haiñ

nahīñ dekhte haiñ tire ḳhvāb jab ham

to phir rāh-e-mulk-e-‘adam dekhte haiñ

ulajhte haiñ jab bhī masā.il meñ 'qaisar'

to us zulf ke pech-o-ḳham dekhte haiñ

'ajab apni haalat ye hum dekhte hain

ki aankhon ko har lamha nam dekhte hain

lagaen to kya aisi duniya se dil hum

musalsal jahan gham pe gham dekhte hain

daraKHton samundar hawa aur falak par

'ajab us ka jah-o-hasham dekhte hain

jo rahta hai shah-rag mein apni usi ko

na tum dekhte ho na hum dekhte hain

hum apne chaman-zar-e-hasti pe ek din

sitam-zar-e-mulk-e-‘adam dekhte hain

wo na-mehrban mehrban ho gaya hai

qadam do qadam chal ke hum dekhte hain

nahin dekhte hain tere KHwab jab hum

to phir rah-e-mulk-e-‘adam dekhte hain

ulajhte hain jab bhi masail mein 'qaisar'

to us zulf ke pech-o-KHam dekhte hain