ajab asbab karta ja raha hun

ajab asbāb kartā jā rahā huuñ

lahū sīmāb kartā jā rahā huuñ

maiñ apnī mauj meñ ik raqs-e-dīgar

sar-e-girdāb kartā jā rahā huuñ

azal se jāgtī āñkhoñ jahāñ meñ

basar ik ḳhvāb kartā jā rahā huuñ

sar-e-mizhgāñ ubhartā hai jo taarā

use mahtāb kartā jā rahā huuñ

jo dil ik umr se banjar paḌe the

unheñ sairāb kartā jā rahā huuñ

maiñ rāh-e-shauq kī har kañkarī ko

dur-e-nāyāb kartā jā rahā huuñ

vo ejāz-e-suḳhan baḳhshā hai us ne

chaTāneñ aab kartā jā rahā huuñ

ajab asbab karta ja raha hun

lahu simab karta ja raha hun

main apni mauj mein ek raqs-e-digar

sar-e-girdab karta ja raha hun

azal se jagti aankhon jahan mein

basar ek KHwab karta ja raha hun

sar-e-mizhgan ubharta hai jo tara

use mahtab karta ja raha hun

jo dil ek umr se banjar paDe the

unhen sairab karta ja raha hun

main rah-e-shauq ki har kankari ko

dur-e-nayab karta ja raha hun

wo ejaz-e-suKHan baKHsha hai us ne

chaTanen aab karta ja raha hun