ajab bechainiyan hain ibtila hai

'ajab bechainiyāñ haiñ ibtilā hai

yahī dar-asl ulfat kā sila hai

safar meñ maiñ akelā to nahīñ huuñ

mire hamrāh ab ik qāfila hai

hamārī ruuh zinda hai azal se

badan to asl meñ faanī milā hai

udāsī ne bujhā kar rakh diyā thā

tire aane se ye chehra khilā hai

sabhī pāgal mujhe kahne lage haiñ

maiñ gum huuñ jab se tū mujh ko milā hai

zamīñ par maiñ maze se jī rahā huuñ

makāñ merā kahāñ nau-manzila hai

yaqīnan hai asar ye zalzale kā

yaqīñ yuuñ hī nahīñ 'hashmat' hilā hai

'ajab bechainiyan hain ibtila hai

yahi dar-asl ulfat ka sila hai

safar mein main akela to nahin hun

mere hamrah ab ek qafila hai

hamari ruh zinda hai azal se

badan to asl mein fani mila hai

udasi ne bujha kar rakh diya tha

tere aane se ye chehra khila hai

sabhi pagal mujhe kahne lage hain

main gum hun jab se tu mujh ko mila hai

zamin par main maze se ji raha hun

makan mera kahan nau-manzila hai

yaqinan hai asar ye zalzale ka

yaqin yun hi nahin 'hashmat' hila hai