ajab maujudgi hai jo kami par mushtamil hai

ajab maujūdgī hai jo kamī par mushtamil hai

kisī kā shor merī ḳhāmushī par mushtamil hai

añdherī sub.h vīrāñ raat yā shām-e-fasurda

mirā har lamha un meñ se kisī par mushtamil hai

nahīñ mil paatī koī bhī hañsī merī hañsī meñ

ye vāhid rañj hai jo rañj hī par mushtamil hai

chamak uThtā hai ik bhūlā huā chehra achānak

na jaane tīrgī kis raushnī par mushtamil hai

sarāb-e-ḳhvāb dekhūñ yā uḌā.ūñ ḳhaak apnī

ye sahrā ik makāñ aur ik galī par mushtamil hai

varaq khulte hī kitnī titliyāñ uḌtī haiñ 'shāriq'

agarche baaġh ik sūkhī kalī par mushtamil hai

ajab maujudgi hai jo kami par mushtamil hai

kisi ka shor meri KHamushi par mushtamil hai

andheri subh viran raat ya sham-e-fasurda

mera har lamha un mein se kisi par mushtamil hai

nahin mil pati koi bhi hansi meri hansi mein

ye wahid ranj hai jo ranj hi par mushtamil hai

chamak uThta hai ek bhula hua chehra achanak

na jaane tirgi kis raushni par mushtamil hai

sarab-e-KHwab dekhun ya uDaun KHak apni

ye sahra ek makan aur ek gali par mushtamil hai

waraq khulte hi kitni titliyan uDti hain 'shaariq'

agarche bagh ek sukhi kali par mushtamil hai