ajab nahin hai mualij shifa se mar jaen

ajab nahīñ hai muālij shifā se mar jaa.eñ

marīz zahr samajh kar davā se mar jaa.eñ

ye soch kar hī hameñ ḳhud-kushī savāb lagī

jo kī hai maañ ne to phir bad-duā se mar jaa.eñ

ye ehtijāj samundar ke dam ko kaafī hai

kisī kināre pe do-chār pyāse mar jaa.eñ

fasādiyoñ ko maiñ is shart par rihā karūñgā

ki fāḳhta ke paroñ kī havā se mar jaa.eñ

tū apne lahje kī riqqat ko thoḌā kam kar de

faqīr log na terī sadā se mar jaa.eñ

uThā ke phirte haiñ ham aap sirf naam to leñ

qasam se aap to kaase kī kā se mar jaa.eñ

ajab nahin hai mualij shifa se mar jaen

mariz zahr samajh kar dawa se mar jaen

ye soch kar hi hamein KHud-kushi sawab lagi

jo ki hai man ne to phir bad-dua se mar jaen

ye ehtijaj samundar ke dam ko kafi hai

kisi kinare pe do-chaar pyase mar jaen

fasadiyon ko main is shart par riha karunga

ki faKHta ke paron ki hawa se mar jaen

tu apne lahje ki riqqat ko thoDa kam kar de

faqir log na teri sada se mar jaen

uTha ke phirte hain hum aap sirf nam to len

qasam se aap to kase ki ka se mar jaen