ajab thin manzilen jin se guzar kar lai

ajab thiiñ manzileñ jin se guzār kar laa.ī

havā hī baam se mujh ko utaar kar laa.ī

mirī sarisht kī zid ne dikhāyā rang apnā

ḳhizāñ kī mauj ko mauj-e-bahār kar laa.ī

nigāh phāñd ga.ī bāġh-e-dil kā darvāza

samar bhī shāḳh-e-tavajjoh se paar kar laa.ī

kināre aa to gayā maiñ magar hayāt mirī

har ik salīb se mujh ko guzār kar laa.ī

ḳhayāl-e-ḳhushk ne sairāb honā chāhā to

ye aañkh jam.a ka.ī ābshār kar laa.ī

mah-o-nujūm ne koshish bahut kī rokne kī

falak se mujh ko mirī ḳhū utaar kar laa.ī

bikherte rahe ham aur havā kī zinda-dilī

jab aa.ī jam.a hamārā ġhubār kar laa.ī

maiñ jis ko chāhtā thā ye parinda vo to nahīñ

ye kis ko merī tamanna shikār kar laa.ī

harīs-e-sā.at-e-ḳhush-dīda thī so mere liye

gul-e-fasurda ko 'yāvar' sañvār kar laa.ī

ajab thin manzilen jin se guzar kar lai

hawa hi baam se mujh ko utar kar lai

meri sarisht ki zid ne dikhaya rang apna

KHizan ki mauj ko mauj-e-bahaar kar lai

nigah phand gai bagh-e-dil ka darwaza

samar bhi shaKH-e-tawajjoh se par kar lai

kinare aa to gaya main magar hayat meri

har ek salib se mujh ko guzar kar lai

KHayal-e-KHushk ne sairab hona chaha to

ye aankh jama kai aabshaar kar lai

mah-o-nujum ne koshish bahut ki rokne ki

falak se mujh ko meri KHu utar kar lai

bikherte rahe hum aur hawa ki zinda-dili

jab aai jama hamara ghubar kar lai

main jis ko chahta tha ye parinda wo to nahin

ye kis ko meri tamanna shikar kar lai

haris-e-saat-e-KHush-dida thi so mere liye

gul-e-fasurda ko 'yawar' sanwar kar lai