ajib dhup ke zer-e-asar raha hun main

'ajīb dhuup ke zer-e-asar rahā huuñ maiñ

shadīd chhāoñ meñ chalne se Dar rahā huuñ maiñ

pata haiñ rāstoñ ke saare pech-o-ḳham mujh ko

na jaane kitnoñ kā raḳht-e-safar rahā huuñ maiñ

hujūm-e-shahr kī rangīniyoñ se jhuñjhlā kar

junūñ meñ dasht ko ābād kar rahā huuñ maiñ

mire zavāl kī koī to had muqarrar kar

tirī nazar se musalsal utar rahā huuñ maiñ

abhī jo dekh ke hairān ho rahe ho tum

ga.ī rutoñ meñ bhī shorīda-sar rahā huuñ maiñ

balā kī shoḳh haiñ vo ā.ina-sifat āñkheñ

ki jin ke dekhne se ban-sañvar rahā huuñ maiñ

'ajib dhup ke zer-e-asar raha hun main

shadid chhaon mein chalne se Dar raha hun main

pata hain raston ke sare pech-o-KHam mujh ko

na jaane kitnon ka raKHt-e-safar raha hun main

hujum-e-shahr ki ranginiyon se jhunjhla kar

junun mein dasht ko aabaad kar raha hun main

mere zawal ki koi to had muqarrar kar

teri nazar se musalsal utar raha hun main

abhi jo dekh ke hairan ho rahe ho tum

gai ruton mein bhi shorida-sar raha hun main

bala ki shoKH hain wo aaina-sifat aankhen

ki jin ke dekhne se ban-sanwar raha hun main