ajib jang-o-jidal har pal hai mere andar

ajiib jañg-o-jidāl har pal hai mere andar

ki nūr-o-zulmat kā ek maqtal hai mere andar

uge haiñ mujh meñ hazār-hā ḳhār-zār paude

phir is pe turra ki ruuh malmal hai mere andar

ye kaisī be-ma.anī zindagī ho ke rah ga.ī hai

na kuchh adhūrā na kuchh mukammal hai mere andar

maiñ jāntā huuñ ki ḳhatm hogā na ye ta.affun

magar luTā.ūñgā jitnā sandal hai mere andar

samundaroñ meñ kahāñ tamavvuj hai aisā mumkin

ki jo talātum hai jaisī halchal hai mere andar

baḌe-baḌoñ ko samajh rahā hai jo tifl-e-maktab

'nadīm' āḳhir vo kaun pāgal hai mere andar

ajib jang-o-jidal har pal hai mere andar

ki nur-o-zulmat ka ek maqtal hai mere andar

uge hain mujh mein hazar-ha KHar-zar paude

phir is pe turra ki ruh malmal hai mere andar

ye kaisi be-mani zindagi ho ke rah gai hai

na kuchh adhura na kuchh mukammal hai mere andar

main jaanta hun ki KHatm hoga na ye taffun

magar luTaunga jitna sandal hai mere andar

samundaron mein kahan tamawwuj hai aisa mumkin

ki jo talatum hai jaisi halchal hai mere andar

baDe-baDon ko samajh raha hai jo tifl-e-maktab

'nadim' aaKHir wo kaun pagal hai mere andar