ajib karb hai us shaKHs ke fasane mein

'ajīb karb hai us shaḳhs ke fasāne meñ

vo jis kī maut huī dostī nibhāne meñ

kabhī to rahmateñ itnī ki dil uchāT huā

kabhī tabāh kiyā ham ko āzmāne meñ

vuzū meñ haath ko dhote namāz paḌhte ham

koī charāġh to jaltā siyāh-ḳhāne meñ

mafāriqat kī batāo hai kaun sī manzil

ki ḳhud ko bhuul ga.e ham tujhe bhulāne meñ

mirā vujūd bhī ġhā.eb sā ho rahā hai kahīñ

yahī maiñ bhuul gayā vaqt ke churāne meñ

Tapak rahā hai lahū mere ghar ke chhappar se

ye baat kyoñ nahīñ shāmil mire fasāne meñ

tumhāre ghar meñ jo sūraj kī hai numūd 'shamīm'

ujālā baañT do sab raat ke gharāne meñ

'ajib karb hai us shaKHs ke fasane mein

wo jis ki maut hui dosti nibhane mein

kabhi to rahmaten itni ki dil uchaT hua

kabhi tabah kiya hum ko aazmane mein

wuzu mein hath ko dhote namaz paDhte hum

koi charagh to jalta siyah-KHane mein

mafariqat ki batao hai kaun si manzil

ki KHud ko bhul gae hum tujhe bhulane mein

mera wujud bhi ghaeb sa ho raha hai kahin

yahi main bhul gaya waqt ke churane mein

Tapak raha hai lahu mere ghar ke chhappar se

ye baat kyon nahin shamil mere fasane mein

tumhaare ghar mein jo suraj ki hai numud 'shamim'

ujala banT do sab raat ke gharane mein