ajib nashsha hai hoshyar rahna chahta hun

ajiib nashsha hai hoshyār rahnā chāhtā huñ

maiñ us ke ḳhvāb meñ bedār rahnā chāhtā huñ

ye mauj-e-tāza mirī tishnagī kā vahm sahī

maiñ is sarāb meñ sarshār rahnā chāhtā huñ

siyāh chashm mirī vahshatoñ pe tanz na kar

maiñ qātiloñ se ḳhabar-dār rahnā chāhtā huñ

ye dard hī mirā chāra hai tum ko kyā ma.alūm

haTāo haath maiñ bīmār rahnā chāhtā huñ

idhar bhī aa.egī shāyad vo shāh-bānu-e-shahr

ye soch kar sar-e-bāzār rahnā chāhtā huñ

havā gulāb ko chhū kar guzartī rahtī hai

so maiñ bhī itnā gunahgār rahnā chāhtā huñ

ajib nashsha hai hoshyar rahna chahta hun

main us ke KHwab mein bedar rahna chahta hun

ye mauj-e-taza meri tishnagi ka wahm sahi

main is sarab mein sarshaar rahna chahta hun

siyah chashm meri wahshaton pe tanz na kar

main qatilon se KHabar-dar rahna chahta hun

ye dard hi mera chaara hai tum ko kya malum

haTao hath main bimar rahna chahta hun

idhar bhi aaegi shayad wo shah-banu-e-shahr

ye soch kar sar-e-bazar rahna chahta hun

hawa gulab ko chhu kar guzarti rahti hai

so main bhi itna gunahgar rahna chahta hun