ajib tajraba aankhon ko hone wala tha

ajiib tajraba āñkhoñ ko hone vaalā thā

baġhair niiñd maiñ kal raat sone vaalā thā

tabhī vahīñ mujhe us kī hañsī sunā.ī paḌī

maiñ us kī yaad meñ palkeñ bhigone vaalā thā

kisī badan kī sadā ne bachā liyā mujh ko

maiñ varna ruuh ke jangal meñ khone vaalā thā

ye soch soch ke ab to hañsī sī aatī hai

shurū-e-ishq meñ kitnā maiñ rone vaalā thā

kabhī huī na mulāqāt shahr se merī

maiñ jab bhī so ke uThā shahr sone vaalā thā

agar yahī hai mohabbat to hone vaalī thī

vo milne vaalā thā mujh ko maiñ khone vaalā thā

mujhe nikāl diyā ta.aziyat ke jalse se

ki bas vahāñ maiñ akelā hī rone vaalā thā

ye merā dīda-e-tar ḳhushk ho gayā varna

mire liye bhī yahāñ koī rone vaalā thā

is aa.ine ne usūloñ pe zid na kī varna

maiñ apne aap ke bar-aks hone vaalā thā

kisī ne mahfil-e-duniyā kī dhun badal Daalī

zamāna jab mirā ham-raqs hone vaalā thā

vahāñ bas ik dil-e-ḳhālī thā aur miyāñ-'ehsās'

na ishq un ko huā thā na hone vaalā thā

ajib tajraba aankhon ko hone wala tha

baghair nind main kal raat sone wala tha

tabhi wahin mujhe us ki hansi sunai paDi

main us ki yaad mein palken bhigone wala tha

kisi badan ki sada ne bacha liya mujh ko

main warna ruh ke jangal mein khone wala tha

ye soch soch ke ab to hansi si aati hai

shuru-e-ishq mein kitna main rone wala tha

kabhi hui na mulaqat shahr se meri

main jab bhi so ke uTha shahr sone wala tha

agar yahi hai mohabbat to hone wali thi

wo milne wala tha mujh ko main khone wala tha

mujhe nikal diya taziyat ke jalse se

ki bas wahan main akela hi rone wala tha

ye mera dida-e-tar KHushk ho gaya warna

mere liye bhi yahan koi rone wala tha

is aaine ne usulon pe zid na ki warna

main apne aap ke bar-aks hone wala tha

kisi ne mahfil-e-duniya ki dhun badal Dali

zamana jab mera ham-raqs hone wala tha

wahan bas ek dil-e-KHali tha aur miyan-'ehsas'

na ishq un ko hua tha na hone wala tha