aks-e-KHayal-e-yar sanwara karenge hum

aks-e-ḳhayāl-e-yār sañvārā kareñge ham

shīshe meñ aa.ine ko utārā kareñge ham

sahrā meñ e'timād ke gum-sum samā.ateñ

kuchh log kah rahe the pukārā kareñge ham

gardan kaTī hai haath bhī shānoñ se kaT ga.e

qātil kī samt kaise ishāra kareñge ham

mere ḳhilāf vo bhī samundar se mil ga.e

dariyā to kah rahe the kinārā kareñge ham

chādar se jab na chhup sakā sukḌā huā badan

khul kar ab apne paañv pasārā kareñge ham

sāñsoñ kī tarah ye bhī haiñ jiine ko lāzmī

choTeñ jo dab chukī haiñ ubhārā kareñge ham

'aḳhtar' hoñ jab sitāre sabhī āsmān par

phir kyuuñ kisī zamīñ pe guzārā kareñge ham

aks-e-KHayal-e-yar sanwara karenge hum

shishe mein aaine ko utara karenge hum

sahra mein e'timad ke gum-sum samaaten

kuchh log kah rahe the pukara karenge hum

gardan kaTi hai hath bhi shanon se kaT gae

qatil ki samt kaise ishaara karenge hum

mere KHilaf wo bhi samundar se mil gae

dariya to kah rahe the kinara karenge hum

chadar se jab na chhup saka sukDa hua badan

khul kar ab apne panw pasara karenge hum

sanson ki tarah ye bhi hain jine ko lazmi

choTen jo dab chuki hain ubhaara karenge hum

'aKHtar' hon jab sitare sabhi aasman par

phir kyun kisi zamin pe guzara karenge hum