aks-e-zanjir pe jaan dene ke pahlu dunga

aks-e-zanjīr pe jaañ dene ke pahlū dūñgā

kuchh sazā tujh ko bhī ai shāhid-e-gesū dūñgā

apne ghar se tujhe jaane nahīñ dūñgā ḳhālī

mujh ko hiire nahīñ hāsil haiñ to jugnū dūñgā

zindagī tujh se ye samjhauta kiyā hai maiñ ne

beḌiyāñ tū mujhe de maiñ tujhe ghuñghrū dūñgā

mujh ko duniyā kī tijārat meñ yahī haath aayā

maiñ ne aañsū hī kamā.e tujhe aañsū dūñgā

maiñ huuñ dariyā mujhe ḳhidmat meñ lage rahnā hai

maiñ agar suukh bhī jā.ūñgā to baalū dūñgā

maiñ to ik peḌ huuñ chandan kā mujhe jism na jaan

tū mujhe qatl bhī kar degā to ḳhushbū dūñgā

pahle kuchh baañT usūloñ ke banā lo 'tasnīm'

jis meñ kirdār tuleñ maiñ vo tarāzū dūñgā

aks-e-zanjir pe jaan dene ke pahlu dunga

kuchh saza tujh ko bhi ai shahid-e-gesu dunga

apne ghar se tujhe jaane nahin dunga KHali

mujh ko hire nahin hasil hain to jugnu dunga

zindagi tujh se ye samjhauta kiya hai main ne

beDiyan tu mujhe de main tujhe ghunghru dunga

mujh ko duniya ki tijarat mein yahi hath aaya

main ne aansu hi kamae tujhe aansu dunga

main hun dariya mujhe KHidmat mein lage rahna hai

main agar sukh bhi jaunga to baalu dunga

main to ek peD hun chandan ka mujhe jism na jaan

tu mujhe qatl bhi kar dega to KHushbu dunga

pahle kuchh banT usulon ke bana lo 'tasnim'

jis mein kirdar tulen main wo taraazu dunga