aks manzar mein palaTne ke liye hota hai

aks manzar meñ palaTne ke liye hotā hai

ā.īna gard se aTne ke liye hotā hai

shaam hotī hai to hotā hai mirā dil betāb

aur ye tujh se lipaTne ke liye hotā hai

ye jo ham dekh rahe haiñ ka.ī duniyāoñ ko

aisā phailāo simaTne ke liye hotā hai

ilm jitnā bhī ho kam paḌtā hai insānoñ ko

rizq jitnā bhī ho baTne ke liye hotā hai

saa.e ko shāmil-e-qāmat na karo āḳhir-kār

baḌh bhī jaa.e to ye ghaTne ke liye hotā hai

goyā duniyā kī zarūrat nahīñ durveshoñ ko

ya.anī kashkol ulaTne ke liye hotā hai

matl-e-sub.h-e-numū saaf to hogā 'āzar'

abr chhāyā huā chhaTne ke liye hotā hai

aks manzar mein palaTne ke liye hota hai

aaina gard se aTne ke liye hota hai

sham hoti hai to hota hai mera dil betab

aur ye tujh se lipaTne ke liye hota hai

ye jo hum dekh rahe hain kai duniyaon ko

aisa phailao simaTne ke liye hota hai

ilm jitna bhi ho kam paDta hai insanon ko

rizq jitna bhi ho baTne ke liye hota hai

sae ko shamil-e-qamat na karo aaKHir-kar

baDh bhi jae to ye ghaTne ke liye hota hai

goya duniya ki zarurat nahin durweshon ko

yani kashkol ulaTne ke liye hota hai

matl-e-subh-e-numu saf to hoga 'azar'

abr chhaya hua chhaTne ke liye hota hai