alfaz-e-be-sada ka imkan aaine mein

alfāz-e-be-sadā kā imkān aa.ine meñ

dekhā hai maiñ ne aksar be-jān aa.ine meñ

kamre meñ raqs kartī chaltī haiñ jab havā.eñ

kuchh aks bolte haiñ har aan aa.ine meñ

hogā kisī kā chehra pahchān kī lagan meñ

hoñgī kisī kī āñkheñ hairān aa.ine meñ

tahzīb kā tasallut hai aa.ine se bāhar

tārīḳh ke safar kā vijdān aa.ine meñ

rangoñ kī bārishoñ se dhuñdlā gayā hai manzar

aayā huā hai koī tūfān aa.ine meñ

zinda haqīqatoñ kī hotī hai parda-poshī

paltī hai jab ra.ūnat nādān aa.ine meñ

ho raushnī ki zulmat sahrā ho yā samundar

hotā hai zindagī kā 'irfān' aa.ine meñ

alfaz-e-be-sada ka imkan aaine mein

dekha hai main ne aksar be-jaan aaine mein

kamre mein raqs karti chalti hain jab hawaen

kuchh aks bolte hain har aan aaine mein

hoga kisi ka chehra pahchan ki lagan mein

hongi kisi ki aankhen hairan aaine mein

tahzib ka tasallut hai aaine se bahar

tariKH ke safar ka wijdan aaine mein

rangon ki barishon se dhundla gaya hai manzar

aaya hua hai koi tufan aaine mein

zinda haqiqaton ki hoti hai parda-poshi

palti hai jab raunat nadan aaine mein

ho raushni ki zulmat sahra ho ya samundar

hota hai zindagi ka 'irfan' aaine mein