allah de sake to de aisi zaban mujhe

allāh de sake to de aisī zabāñ mujhe

apnā samajh ke dil se lagā le jahāñ mujhe

sehn-e-chaman se jab bhī uThā hai dhuāñ kabhī

yaad aa ke rah gayā hai mirā āshiyāñ mujhe

ḳhār-e-nafas ne mujh ko na sone diyā kabhī

ik umr maut detī rahī loriyāñ mujhe

maiñ ik charāġh laakh charāġhoñ meñ baT gayā

rakkhā jo ā.inoñ ne kabhī darmiyāñ mujhe

maiñ aane vaale qāfile kā miir ban gayā

chhoḌā thā sāthiyoñ ne pas-e-kārvāñ mujhe

har mauj se ulajhtī huī kheltī huī

sāhil pe laa.ī kashti-e-umr-e-ravāñ mujhe

'sīmāb' dasht-e-zīst se maiñ kyā karūñ gila

baḳhshī haiñ bastiyoñ ne bhī vīrāniyāñ mujhe

allah de sake to de aisi zaban mujhe

apna samajh ke dil se laga le jahan mujhe

sehn-e-chaman se jab bhi uTha hai dhuan kabhi

yaad aa ke rah gaya hai mera aashiyan mujhe

KHar-e-nafas ne mujh ko na sone diya kabhi

ek umr maut deti rahi loriyan mujhe

main ek charagh lakh charaghon mein baT gaya

rakkha jo aainon ne kabhi darmiyan mujhe

main aane wale qafile ka mir ban gaya

chhoDa tha sathiyon ne pas-e-karwan mujhe

har mauj se ulajhti hui khelti hui

sahil pe lai kashti-e-umr-e-rawan mujhe

'simab' dasht-e-zist se main kya karun gila

baKHshi hain bastiyon ne bhi viraniyan mujhe