amal sen mai-paraston ke tujhe kya kaam ai waiz

amal señ mai-parastoñ ke tujhe kyā kaam ai vaa.iz

sharāb-e-shauq kā tū ne piyā niiñ jaam ai vaa.iz

lagegā sañg-e-ḳhajlat shīsha-e-nāmūs par tere

abas ham be-gunāhoñ kuuñ na kar bad-nām ai vaa.iz

nahīñ hai imtiyāz-e-nek-o-bad chashm-e-haqīqat meñ

mujhe yaksāñ huā hai kufr aur islām ai vaa.iz

niyāz-e-be-ḳhudī behtar namāz-e-ḳhud-numā.ī señ

na kar ham puḳhta-maġhzoñ señ ḳhayāl-e-ḳhām ai vaa.iz

kalām-e-nuqta-e-ilm muḳhtasar hai sab ma.ānī kā

bayān-e-mantiq-e-darsī kuuñ niiñ anjām ai vaa.iz

vo shīrīñ-lab kī kaḌve bol amrit haiñ mire haq meñ

tujhe ma.alūm kyā hai lazzat-e-dushnām ai vaa.iz

'sirāj' us kāba-e-jāñ ke tasavvur kuuñ kiyā sumran

yahī vird-e-sahar hai aur duā-e-shām ai vaa.iz

amal sen mai-paraston ke tujhe kya kaam ai waiz

sharab-e-shauq ka tu ne piya nin jam ai waiz

lagega sang-e-KHajlat shisha-e-namus par tere

abas hum be-gunahon kun na kar bad-nam ai waiz

nahin hai imtiyaz-e-nek-o-bad chashm-e-haqiqat mein

mujhe yaksan hua hai kufr aur islam ai waiz

niyaz-e-be-KHudi behtar namaz-e-KHud-numai sen

na kar hum puKHta-maghzon sen KHayal-e-KHam ai waiz

kalam-e-nuqta-e-ilm muKHtasar hai sab maani ka

bayan-e-mantiq-e-darsi kun nin anjam ai waiz

wo shirin-lab ki kaDwe bol amrit hain mere haq mein

tujhe malum kya hai lazzat-e-dushnam ai waiz

'siraj' us kaba-e-jaan ke tasawwur kun kiya sumran

yahi wird-e-sahar hai aur dua-e-sham ai waiz