amir-e-shahr ki chaukhaT pe ja ke lauT aaya

amīr-e-shahr kī chaukhaT pe jā ke lauT aayā

ġharīb-e-vaqt añgūThā dikhā ke lauT aayā

lagā rahā thā maiñ baḌh chaḌh ke boliyāñ lekin

ḳharīdā kuchh nahīñ qīmat baḌhā ke lauT aayā

kasar rahī-sahī kar deñgī āñdhiyāñ puurī

maiñ us daraḳht ko jaḌ se hilā ke lauT aayā

maiñ chāñd chhūne kī ḳhvāhish meñ ghar se niklā thā

aur apnī palkoñ pe taare sajā ke lauT aayā

bujhā diyā thā jise sar-phirī havāoñ ne

maiñ us charāġh ko phir se jalā ke lauT aayā

vo ibtidā-e-safar meñ hī khul gayā mujh par

maiñ us ke saath zarā duur jā ke lauT aayā

'kamāl' us ne mire dil kā haal pūchhā thā

maiñ us ko 'mīr' kī ġhazleñ sunā ke lauT aayā

amir-e-shahr ki chaukhaT pe ja ke lauT aaya

gharib-e-waqt anguTha dikha ke lauT aaya

laga raha tha main baDh chaDh ke boliyan lekin

KHarida kuchh nahin qimat baDha ke lauT aaya

kasar rahi-sahi kar dengi aandhiyan puri

main us daraKHt ko jaD se hila ke lauT aaya

main chand chhune ki KHwahish mein ghar se nikla tha

aur apni palkon pe tare saja ke lauT aaya

bujha diya tha jise sar-phiri hawaon ne

main us charagh ko phir se jala ke lauT aaya

wo ibtida-e-safar mein hi khul gaya mujh par

main us ke sath zara dur ja ke lauT aaya

'kamal' us ne mere dil ka haal puchha tha

main us ko 'mir' ki ghazlen suna ke lauT aaya