amiron tak rasai ho chuki bas

amīroñ tak rasā.ī ho chukī bas

mirī baḳht-āzmā.ī ho chukī bas

bahār ab ke bhī jo guzrī qafas meñ

to phir apnī rihā.ī ho chukī bas

kahāñ tak us se qissa qaziya har shab

bahut bāham laḌā.ī ho chukī bas

na aayā vo mire jaate jahāñ se

yahīñ tak āshnā.ī ho chukī bas

lagā hai hausla bhī karne tañgī

ġhamoñ kī ab samā.ī ho chukī bas

barābar ḳhaak ke to kar dikhāyā

falak bas be-adā.ī ho chukī bas

danī ke paas kuchh rahtī hai daulat

hamāre haath aa.ī ho chukī bas

dikhā us but ko phir bhī yā ḳhudāyā

tirī qudrat-numā.ī ho chukī bas

sharar kī sī hai chashmak fursat-e-umr

jahāñ de Tuk dikhā.ī ho chukī bas

gale meñ gervī kafnī hai ab 'mīr'

tumhārī mīrzā.ī ho chukī bas

amiron tak rasai ho chuki bas

meri baKHt-azmai ho chuki bas

bahaar ab ke bhi jo guzri qafas mein

to phir apni rihai ho chuki bas

kahan tak us se qissa qaziya har shab

bahut baham laDai ho chuki bas

na aaya wo mere jate jahan se

yahin tak aashnai ho chuki bas

laga hai hausla bhi karne tangi

ghamon ki ab samai ho chuki bas

barabar KHak ke to kar dikhaya

falak bas be-adai ho chuki bas

dani ke pas kuchh rahti hai daulat

hamare hath aai ho chuki bas

dikha us but ko phir bhi ya KHudaya

teri qudrat-numai ho chuki bas

sharar ki si hai chashmak fursat-e-umr

jahan de Tuk dikhai ho chuki bas

gale mein gerwi kafni hai ab 'mir'

tumhaari mirzai ho chuki bas