amrad hue hain tere KHaridar chaar panch

amrad hue haiñ tere ḳharīdār chaar pāñch

de aise aur haq mujhe aġhyār chaar pāñch

jab gudgudāte haiñ tujhe ham aur Dhab se tab

sahte haiñ gāliyāñ tirī nā-chār chaar pāñch

kal yuuñ kahā ki Tuk tū Thahar le to bole aap

haiñ muntazir mire sar-e-bāzār chaar pāñch

o jaane vaale shaḳhs Tuk ik muḌ ke dekh le

yaañ bhī taḌap rahe haiñ gunahgār chaar pāñch

sayyād le ḳhabar ki diyā chāhte haiñ jaan

kunj-e-qafas meñ taaza giraftār chaar pāñch

myaañ ham bhī koī qahr haiñ jab dekho tab liye

baiThe haiñ apne paas tarahdār chaar pāñch

chupke se tum jo kahte ho haiñ apne āshnā

sho'la bhabhūke aur dhuāñ-dhār chaar pāñch

har ek un se shoḳh hai kyā ḳhuub baat ho

lag jaa.eñ tere haath jo yak-bār chaar pāñch

tū un ko chaah chhoḌ mujhe vāchhaḌe che-ḳhush

rakkhe haiñ mere vāste dildār chaar pāñch

hai kaam ek hī se vo chūlhe meñ sab paḌeñ

sadqe kiye the aise vo finnār chaar pāñch

sāhib tumhīñ tumhīñ nahīñ hargiz nahīñ nahīñ

mujh ko nahīñ nahīñ nahīñ darkār chaar pāñch

'mīr' o 'qatīl' o 'mus.hafī' o 'jur.at' o 'makīñ'

haiñ shā'iroñ meñ ye jo numūdār chaar pāñch

so ḳhuub jānte haiñ ki har ek rang ke

'inshā' kī har ġhazal meñ haiñ ash'ār chaar pāñch

amrad hue hain tere KHaridar chaar panch

de aise aur haq mujhe aghyar chaar panch

jab gudgudate hain tujhe hum aur Dhab se tab

sahte hain galiyan teri na-chaar chaar panch

kal yun kaha ki Tuk tu Thahar le to bole aap

hain muntazir mere sar-e-bazar chaar panch

o jaane wale shaKHs Tuk ek muD ke dekh le

yan bhi taDap rahe hain gunahgar chaar panch

sayyaad le KHabar ki diya chahte hain jaan

kunj-e-qafas mein taza giraftar chaar panch

myan hum bhi koi qahr hain jab dekho tab liye

baiThe hain apne pas tarahdar chaar panch

chupke se tum jo kahte ho hain apne aashna

sho'la bhabhuke aur dhuan-dhaar chaar panch

har ek un se shoKH hai kya KHub baat ho

lag jaen tere hath jo yak-bar chaar panch

tu un ko chah chhoD mujhe wachhaDe che-KHush

rakkhe hain mere waste dildar chaar panch

hai kaam ek hi se wo chulhe mein sab paDen

sadqe kiye the aise wo finnar chaar panch

sahib tumhin tumhin nahin hargiz nahin nahin

mujh ko nahin nahin nahin darkar chaar panch

'mir' o 'qatil' o 'mushafi' o 'jurat' o 'makin'

hain sha'iron mein ye jo numudar chaar panch

so KHub jaante hain ki har ek rang ke

'insha' ki har ghazal mein hain ash'ar chaar panch