an-ginat shadab jismon ki jawani pi gaya

an-ginat shādāb jismoñ kī javānī pī gayā

vo samundar kitne dariyāoñ kā paanī pī gayā

narm sub.heñ pī gayā shāmeñ suhānī pī gayā

hijr kā mausam diloñ kī shādmānī pī gayā

mere armānoñ kī fasleñ is liye pyāsī rahīñ

ek zālim thā jo kul bastī kā paanī pī gayā

le ga.e tum chhīn kar alfāz kā amrit-kalas

maiñ vo shivshañkar thā jo zahr-e-ma.ānī pī gayā

ik tavajjoh kī nazar shikve gile sab khā ga.ī

ik tabassum umr bhar kī bad-gumānī pī gayā

agle vaqtoñ kī muravvat rah ga.ī ban kar sarāb

vaqt kā sahrā sabhī qadreñ purānī pī gayā

zahr Daalā thā ki amrit tū ne mere jaam meñ

kuchh bhī ho maiñ ne tirī talqīn-e-ma.anī pī gayā

jā ke vo barsā na-jāne kis samundar par 'shabāb'

aah jo bādal mirī jhīloñ kā paanī pī gayā

an-ginat shadab jismon ki jawani pi gaya

wo samundar kitne dariyaon ka pani pi gaya

narm subhen pi gaya shamen suhani pi gaya

hijr ka mausam dilon ki shadmani pi gaya

mere armanon ki faslen is liye pyasi rahin

ek zalim tha jo kul basti ka pani pi gaya

le gae tum chhin kar alfaz ka amrit-kalas

main wo shiwshankar tha jo zahr-e-maani pi gaya

ek tawajjoh ki nazar shikwe gile sab kha gai

ek tabassum umr bhar ki bad-gumani pi gaya

agle waqton ki murawwat rah gai ban kar sarab

waqt ka sahra sabhi qadren purani pi gaya

zahr Dala tha ki amrit tu ne mere jam mein

kuchh bhi ho main ne teri talqin-e-mani pi gaya

ja ke wo barsa na-jaane kis samundar par 'shabab'

aah jo baadal meri jhilon ka pani pi gaya