ana ke dozaKH mein pal raha hun gharaz ke sahra mein jal raha hun

anā ke dozaḳh meñ pal rahā huuñ ġharaz ke sahrā meñ jal rahā huuñ

ḳhudī kī manzil ko tark kar ke ḳhirad kī rāhoñ pe chal rahā huuñ

koī to ho thaam le jo baḌh kar koī to ho rok le jo aa kar

maiñ zarra zarra bikhar rahā huuñ maiñ qatra qatra pighal rahā huuñ

jo ḳhaak jhaḌne lagī hai merī jo rang utarne lagā badan se

ye ibtidā hai na.e safar kī so keñchulī sī badal rahā huuñ

visāl-e-yārāñ to muḳhtasar thā umīd-e-yārāñ azal se qaa.em

bahak gayā thā maiñ jis nashe meñ usī nashe se sañbhal rahā huuñ

kafālatoñ kā nizām badlā lahū ne rang-e-mizāj badlā

maiñ ajnabī ban ke apne ghar meñ Darā Darā sā Tahal rahā huuñ

na fāsla hai na tīrgī hai na aarzū meñ koī kamī hai

pahuñch gayā huuñ ba-rū-e-manzil qadam qadam par phisal rahā huuñ

bigaḌ rahā hai mirā sarāpā ulajh rahe haiñ ḳhirad ke dhāge

ye irtiqā hai bashar kī qismat so dhīre dhīre badal rahā huuñ

harām kyā hai halāl kyā hai ye lutf-e-kām-o-dahan na jaane

ba-jabr-o-ikrāh chakkhā jis ko ḳhushī ḳhushī vo nigal rahā huuñ

ye zuhd bhī hai qazā-e-'umrī ye zarf bhī hai bas ik libāda

so jis zarūrat ne jaisā chāhā maiñ vaise sāñche meñ Dhal rahā huuñ

naza’ ke 'ālam meñ naam us kā zabāñ se jaarī huā 'amar' kyoñ

chhupā ke rakkhe the 'umr bhar jo vo raaz āḳhir ugal rahā huuñ

ana ke dozaKH mein pal raha hun gharaz ke sahra mein jal raha hun

KHudi ki manzil ko tark kar ke KHirad ki rahon pe chal raha hun

koi to ho tham le jo baDh kar koi to ho rok le jo aa kar

main zarra zarra bikhar raha hun main qatra qatra pighal raha hun

jo KHak jhaDne lagi hai meri jo rang utarne laga badan se

ye ibtida hai nae safar ki so kenchuli si badal raha hun

visal-e-yaran to muKHtasar tha umid-e-yaran azal se qaem

bahak gaya tha main jis nashe mein usi nashe se sanbhal raha hun

kafalaton ka nizam badla lahu ne rang-e-mizaj badla

main ajnabi ban ke apne ghar mein Dara Dara sa Tahal raha hun

na fasla hai na tirgi hai na aarzu mein koi kami hai

pahunch gaya hun ba-ru-e-manzil qadam qadam par phisal raha hun

bigaD raha hai mera sarapa ulajh rahe hain KHirad ke dhage

ye irtiqa hai bashar ki qismat so dhire dhire badal raha hun

haram kya hai halal kya hai ye lutf-e-kaam-o-dahan na jaane

ba-jabr-o-ikrah chakkha jis ko KHushi KHushi wo nigal raha hun

ye zuhd bhi hai qaza-e-'umri ye zarf bhi hai bas ek libaada

so jis zarurat ne jaisa chaha main waise sanche mein Dhal raha hun

naza’ ke 'alam mein nam us ka zaban se jari hua 'amar' kyon

chhupa ke rakkhe the 'umr bhar jo wo raaz aaKHir ugal raha hun