ana ki aag mein har lamha jal raha hun main

anā kī aag meñ har lamha jal rahā huuñ maiñ

ġhizā mirī hai yahī is meñ pal rahā huuñ maiñ

kabhī is aag ke sāñche meñ Dhal rahā huuñ maiñ

kabhī ye barf ki jis meñ pighal rahā huuñ maiñ

har ek sub.h ufuq se nikal rahā huuñ maiñ

shafaq meñ apnī har ik shaam Dhal rahā huuñ maiñ

har ek moḌ pe rasta kuchal rahā huuñ maiñ

ki apne qadmoñ se ḳhud ko kuchal rahā huuñ maiñ

maiñ apne zindāñ meñ qaidī banā gayā ḳhud ko

aur apne aap se bach kar nikal rahā huuñ maiñ

koī to bachcha 'hasan' hai chhupā huā mujh meñ

ki jis kī maañg pe har dam machal rahā huuñ maiñ

ana ki aag mein har lamha jal raha hun main

ghiza meri hai yahi is mein pal raha hun main

kabhi is aag ke sanche mein Dhal raha hun main

kabhi ye barf ki jis mein pighal raha hun main

har ek subh ufuq se nikal raha hun main

shafaq mein apni har ek sham Dhal raha hun main

har ek moD pe rasta kuchal raha hun main

ki apne qadmon se KHud ko kuchal raha hun main

main apne zindan mein qaidi bana gaya KHud ko

aur apne aap se bach kar nikal raha hun main

koi to bachcha 'hasan' hai chhupa hua mujh mein

ki jis ki mang pe har dam machal raha hun main