ana ki oT mein aafaqiyat ka raaz hun main

anā kī oT meñ āfāqiyat kā raaz huuñ maiñ

tire vajūd kā muñh boltā javāz huuñ maiñ

sitam-zarīf tanāsuḳh bhī mere pīchhe hai

yahī nahīñ ki anāsir kī sāz-bāz huuñ maiñ

na merā nuur na saaya na merā ḳham na muhīt

nasheb-e-vaqt meñ Duubā huā farāz huuñ maiñ

mirī shikast kī āvāz bas yahī ya.anī

havā ke dosh pe larzāñ sukūt-e-sāz huuñ maiñ

maiñ silsila huuñ tamaddun kī dhuup chhāñv kā

ki hast-o-nīst ke mābain ik mahāz huuñ maiñ

thakī thakī sī sar-e-rāh intizār kī aañkh

vahī savāl kā uqda ki nīm-bāz huuñ maiñ

hayāt-e-ḳhema-e-mun.im hai jis ke dam ḳham se

usī charāġh kā be-sāḳhta gudāz huuñ maiñ

nigāh-e-sher hai 'rāhī' vo aa.ina jis meñ

nazar nazar hai to ik aks-e-imtiyāz huuñ maiñ

ana ki oT mein aafaqiyat ka raaz hun main

tere wajud ka munh bolta jawaz hun main

sitam-zarif tanasuKH bhi mere pichhe hai

yahi nahin ki anasir ki saz-baz hun main

na mera nur na saya na mera KHam na muhit

nasheb-e-waqt mein Duba hua faraaz hun main

meri shikast ki aawaz bas yahi yani

hawa ke dosh pe larzan sukut-e-saz hun main

main silsila hun tamaddun ki dhup chhanw ka

ki hast-o-nist ke mabain ek mahaz hun main

thaki thaki si sar-e-rah intizar ki aankh

wahi sawal ka uqda ki nim-baz hun main

hayat-e-KHema-e-munim hai jis ke dam KHam se

usi charagh ka be-saKHta gudaz hun main

nigah-e-sher hai 'rahi' wo aaina jis mein

nazar nazar hai to ek aks-e-imtiyaz hun main