ana ko KHud par sawar maine nahin kya tha

anā ko ḳhud par savār maiñ ne nahīñ kiyā thā

tumhāre pīchhe se vaar maiñ ne nahīñ kiyā thā

vo ḳhud girā thā lahū-faroshī kī pastiyoñ meñ

use nahīf o nazār maiñ ne nahīñ kiyā thā

pake hue phal hī toḌe the maiñ ne Tahniyoñ se

shajar ko be-barg-o-bār maiñ ne nahīñ kiyā thā

nishāna bāñdhā thā āshiyānoñ kī samt lekin

koī parinda shikār maiñ ne nahīñ kiyā thā

kuchh is qadar the havās gum-sum ki vaqt-e-hijrat

bilakte bachchoñ ko pyaar maiñ ne nahīñ kiyā thā

mire masā.il to ḳhud-ba-ḳhud hī sulajh ga.e the

kahīñ bhī soch-o-bichār maiñ ne nahīñ kiyā thā

ana ko KHud par sawar main ne nahin kiya tha

tumhaare pichhe se war main ne nahin kiya tha

wo KHud gira tha lahu-faroshi ki pastiyon mein

use nahif o nazar main ne nahin kiya tha

pake hue phal hi toDe the main ne Tahniyon se

shajar ko be-barg-o-bar main ne nahin kiya tha

nishana bandha tha aashiyanon ki samt lekin

koi parinda shikar main ne nahin kiya tha

kuchh is qadar the hawas gum-sum ki waqt-e-hijrat

bilakte bachchon ko pyar main ne nahin kiya tha

mere masail to KHud-ba-KHud hi sulajh gae the

kahin bhi soch-o-bichaar main ne nahin kiya tha