andaz kahin dekha hai mastana kisi ka

andāz kahīñ dekhā hai mastāna kisī kā

shaidā hī huā phir dil-e-dīvāna kisī kā

saaqī nigah-e-mast se terī jo laḌe aañkh

sarshār na kyoñ kar rahe paimāna kisī kā

maskan hai ḳharābī kā tabāhī kā Thikāna

dil se mire baḌh kar nahīñ vīrāna kisī kā

hūroñ meñ na ye naaz na pariyoñ meñ ye andāz

paate haiñ chalan sab se judāgāna kisī kā

kahte haiñ raqīboñ se vo sun kar mire ash.ār

mazmūñ hameñ ḳhush aatā hai rindāna kisī kā

kuchh bint-e-inab par tirā qabza nahīñ vaa.iz

Theke meñ nahīñ hai tire mai-ḳhāna kisī kā

bhejā hai sū-e-mai-kada jo abr ḳhudā ne

maqbūl huā na.ara-e-mastāna kisī kā

yaad aatā hai kyā kyā talab-e-bosa-e-lab par

muñh pher ke ghuñghaT meñ vo sharmānā kisī kā

zikr-e-shab-e-ġham sun ke 'diler' un kā bhī kahnā

ham niiñd meñ sunte nahīñ afsāna kisī kā

andaz kahin dekha hai mastana kisi ka

shaida hi hua phir dil-e-diwana kisi ka

saqi nigah-e-mast se teri jo laDe aankh

sarshaar na kyon kar rahe paimana kisi ka

maskan hai KHarabi ka tabahi ka Thikana

dil se mere baDh kar nahin virana kisi ka

huron mein na ye naz na pariyon mein ye andaz

pate hain chalan sab se judagana kisi ka

kahte hain raqibon se wo sun kar mere ashaar

mazmun hamein KHush aata hai rindana kisi ka

kuchh bint-e-inab par tera qabza nahin waiz

Theke mein nahin hai tere mai-KHana kisi ka

bheja hai su-e-mai-kada jo abr KHuda ne

maqbul hua nara-e-mastana kisi ka

yaad aata hai kya kya talab-e-bosa-e-lab par

munh pher ke ghunghaT mein wo sharmana kisi ka

zikr-e-shab-e-gham sun ke 'diler' un ka bhi kahna

hum nind mein sunte nahin afsana kisi ka