andar hi andar ek khincha-tani hai

andar hī andar ik khīñchā-tānī hai

kaifiyyat dīvāne kī haijānī hai

rone se pahle ye sochnā chāhiye thā

bachā huā āñkhoñ meñ kitnā paanī hai

tere chehre se mil kar ma.alūm huā

merī āñkhoñ meñ kitnī hairānī hai

aas ke shahr meñ muft hai paanī aur havā

zinda rahne kī behad āsānī hai

ruuh kahīñ se mil jaa.e to le aanā

jism hai kyā bas ik vaj.h-e-uryānī hai

maiñ sarsabz huā jaatā huuñ andar se

rang tirī āñkhoñ kā kaisā dhānī hai

soch nahīñ paatā maiñ is ko jism baġhair

ruuh bhī merī lagtā hai jismānī hai

dekh rahā huuñ ka.ī dinoñ se ḳhvāb ajab

dasht hai ik aur dasht meñ gahrā paanī hai

pūchhtā huuñ logoñ se āḳhir kaun hai vo

kahte haiñ ki ek balā tūfānī hai

do kirdār ke naam batā detā huuñ maiñ

yaad agar tum ko bhī ek kahānī hai

soch-samajh kar ḳharch kareñge duniyā par

bachī huī āñkhoñ meñ jo hairānī hai

pīchhe us bastī ke ik vīrāna hai

aur us vīrāne kī ek kahānī hai

pahle kahāñ dekhā hai tum ko yaad nahīñ

sūrat to lagtī jānī-pahchānī hai

kabhī samundar pūchhe to batlā denā

āñkhoñ ke dariyā meñ kitnā paanī hai

ik duniyā hai jis meñ ham tum rahte haiñ

is se aage ik duniyā imkānī hai

pahle isti.māl kiyā hai maiñ ne bhī

lafz-e-mohabbat bilkul hī be-ma.anī hai

ik pyāse ko bhī sairāb na kar paayā

sharm se saarā dariyā pānī-pānī hai

andar hi andar ek khincha-tani hai

kaifiyyat diwane ki haijaani hai

rone se pahle ye sochna chahiye tha

bacha hua aankhon mein kitna pani hai

tere chehre se mil kar malum hua

meri aankhon mein kitni hairani hai

aas ke shahr mein muft hai pani aur hawa

zinda rahne ki behad aasani hai

ruh kahin se mil jae to le aana

jism hai kya bas ek wajh-e-uryani hai

main sarsabz hua jata hun andar se

rang teri aankhon ka kaisa dhani hai

soch nahin pata main is ko jism baghair

ruh bhi meri lagta hai jismani hai

dekh raha hun kai dinon se KHwab ajab

dasht hai ek aur dasht mein gahra pani hai

puchhta hun logon se aaKHir kaun hai wo

kahte hain ki ek bala tufani hai

do kirdar ke nam bata deta hun main

yaad agar tum ko bhi ek kahani hai

soch-samajh kar KHarch karenge duniya par

bachi hui aankhon mein jo hairani hai

pichhe us basti ke ek virana hai

aur us virane ki ek kahani hai

pahle kahan dekha hai tum ko yaad nahin

surat to lagti jaani-pahchani hai

kabhi samundar puchhe to batla dena

aankhon ke dariya mein kitna pani hai

ek duniya hai jis mein hum tum rahte hain

is se aage ek duniya imkani hai

pahle istimal kiya hai main ne bhi

lafz-e-mohabbat bilkul hi be-mani hai

ek pyase ko bhi sairab na kar paya

sharm se sara dariya pani-pani hai